越南兩女學生代睇鋪 1小時賣清香腸網民：應該是人的問題

【健之堂艾草足貼特約】越南網上近日瘋傳一段街頭天眼片，一個原本平平無奇的香腸小食檔，因為兩名女學生「臨時接手」，竟意外變成爆單現場。

片段顯示，事發於本月14日下午約5時，一名中年男檔主因有急事離開，隨口請正在排隊的兩名女學生幫忙睇檔。未料兩人一接手，攤位即時人龍不斷，場面一度混亂，但她們很快上手，迅速分工應付。

其中一人專注燒香腸，另一人負責落單收錢，節奏愈做愈順，出餐速度明顯加快。面對持續湧入的客人，她們不但頂得住，仲愈做愈熟手，短短一小時內將檔上香腸幾乎全部賣清。至傍晚約6時，檔主返回現場時見到貨架見底，當場呆一呆。

片段一出即引起討論，不少網民大讚兩人「天生做生意料」、「比老闆更識做」，有人笑言「直接升職做檔主」、「無痛開工仲要爆生意」。亦有網民打趣指「後生女吸客力太強」、「已知點解平時賣得慢」，甚至有人直言「問題唔係產品，係人」。