【健之堂艾草足貼特約】在最新流傳片段中，日本市川市動植物園人氣日本獼猴Panchi竟然對猴群長輩「還手」，畫面一出即刻引爆網民熱議。
片段拍攝於4月25日，由片中可見，Panchi與一隻成年猴互動，期間對方輕輕拍咗佢一下面，原以為只係普通「教訓」，點知Panchi即刻反應極快，秒速回敬一巴，場面突如其來，連對方都似乎愣一愣。打完之後，Panchi又好似冇事發生咁收手。
網民睇完片紛紛爆笑，有人直言「連大猴都嚇親」、「呢下真係手快過腦」，亦有人笑稱Panchi「學壞咗」、「開始識反擊」，甚至形容佢已經進入「叛逆期」，愈嚟愈大膽。
不過亦有網民為Panchi解話，認為佢平時太受長輩照顧，「恃寵生嬌先會咁放肆」，加上仍屬幼年，「未識分輕重，只係本能反應」。有人就笑言：「而家識還手，下次記得揀對象啦。」
亦有長期關注Panchi嘅網民感慨，指一路睇住牠由細到大，「開始有情緒、有脾氣，好似睇住個細路長大」，雖然調皮，但依然覺得可愛又真實。
Panchi一舉一動向來自帶話題，由「黐人精」到「翻車事件」，再到今次「出手還擊」，每次都成功吸引大量話題。
