返回體育
體育

時隔36年再現半場戴帽 雷恩達斯21分鐘轟3球 荷蘭主場7:0血洗希臘

時隔36年再現半場戴帽 雷恩達斯21分鐘轟3球 荷蘭主場7:0血洗希臘

歐洲國家聯賽A2組第5輪上演榜首大戰,荷蘭主場迎戰希臘,憑住中場雷恩達斯僅用21分鐘便大演帽子戲法,加上串演左閘嘅添巴梅開二度,最終以7:0大勝對手。雷恩達斯更成為自1990年名宿雲巴士頓之後,首位能夠喺成年國際賽半場已經連入三球嘅荷蘭球員。賽前同得8分嘅兩隊分出高下後,荷蘭五戰累積11分,以三分優勢獨佔小組榜首,最後一輪作客德國只要保持不敗即可首名晉級八強。

希臘後場失誤 森馬維6分鐘先開紀錄

希臘開局一次後場失誤,令荷蘭只用6分鐘就順利打開缺口。馬夫洛柏路斯先將皮球交到加普腳下,回身試圖截斷對方傳送時卻又將波送到森馬維面前,後者控定冷靜射向遠角先開紀錄。戰至12分鐘,韋文送出一記直線劏穿希臘防線,雷恩達斯走入空位起左腳抽入擴大比數。短短6分鐘後,添巴喺左路傳中,馬倫接應後再橫傳返門前,雷恩達斯面對空門輕鬆撞入成3:0。

雷恩達斯極速戴帽 添巴首開國際賽紀錄

希臘其後一度趁荷蘭門將華布根出迎跣腳將皮球送入網窩,但因手球犯規在先被判入球作廢。大難不死嘅荷蘭去到33分鐘再下一城,韋文傳向鄧費斯,後者頭槌二傳,雷恩達斯喺遠柱起腳射中楣底彈入,極速完成帽子戲法。完半場前5分鐘,馬倫突破後再度交出助攻,添巴近門撞入射入個人首個國際賽入波,協助橙軍帶住5:0嘅遙遙領先優勢返回更衣室。

鄧費斯兩送助攻 荷蘭7:0收兵

換邊後荷蘭作出調動,由古普美拿斯入替迪莊。希臘下半場初段一度搶回部分攻勢,但荷蘭右閘鄧費斯隨即喺三分鐘內連續兩次右路傳中,徹底摧毀對手防線。59分鐘,希臘門將雖然掂到鄧費斯嘅傳中,但仍然未能截住皮球,趕到嘅添巴近門再下一城完成梅開二度。去到62分鐘,鄧費斯再次由右路將皮球送入禁區,今次輪到上半場兩度交出助攻嘅馬倫起腳射入遠角,為荷蘭將比分定格喺7:0,以一場清風送爽嘅大勝迎接煞科戰。

延伸閱讀:簡尼破紀錄之夜 英格蘭2:1挫克羅地亞|更多荷蘭新聞|更多體育新聞

分享此文章

✓ 已複製連結