2026年NBA季後賽嘅對陣名單終於出爐啦！全部20支球隊嘅種子排名已經鎖定，季後賽會喺今個星期三嘅附加賽（Play-In）打頭陣，而傳統嘅16強季後賽就會喺4月18號星期六深夜正式開打。
啱啱過咗嘅星期日煞科戰真係好睇過戲：多倫多速龍成功搶到東岸最後一個前六位，直接殺入季後賽；而西岸嗰邊，丹佛金塊就力壓洛杉磯湖人，坐穩西岸第三種子。雖然第七同第八種子仲要等附加賽打完先知，但東西岸已經各有兩組首圈對陣落實咗，戰火隨時一觸即發。
先講東岸，底特律活塞竟然攞到第一種子，呢個賽果季前真係冇乜人估到。呢支一哥依家有主場之利兼且可以抖足精神，坐定定等附加賽贏出嗰隊。排第二嘅波士頓塞爾特人就會喺首圈對住費城76人同奧蘭多魔術之間嘅勝方。至於已經落實咗嘅對決，第三種子紐約人將會迎戰第六種子阿特蘭大鷹隊，呢對充滿恩怨嘅球隊又再碰頭，麥迪遜花園廣場到時肯定嘈到拆天。另一邊廂，第四種子克里夫蘭騎士就會同第五種子速龍死過。雖然騎士有主場之利，但速龍喺煞科日成功爭到前六，氣勢如虹，呢輪肯定打得難分難解。
睇埋西岸，奧克拉荷馬雷霆穩坐第一種子，等緊第八種子誕生。不過全場焦點肯定落喺第二種子聖安東尼奧馬刺身上。冇錯，我哋終於等到 Victor Wembanyama 萬眾矚目嘅季後賽「地標」戰！佢同馬刺依家就等緊西岸附加賽爭崩頭出線嗰隊。西岸已經落實嘅兩組首圈對陣都係火星撞地球。第三種子金塊會硬撼第六種子明尼蘇達木狼，絕對係重量級內線大戰，Nikola Jokic 同金塊一開波就要面對木狼巨型陣容嘅嚴密防守。而第四種子湖人就要對住第五種子侯斯頓火箭，LeBron James 同湖人星期日爭唔到第三，搞到首圈就要面對陣容年輕有活力，加埋巨星老將KD又極度渴求勝利嘅火箭，絕對係一場硬仗。
本港時間時間15號早上會先打兩場，早上7:30分有東岸第九嘅夏洛特黃蜂迎戰第十嘅邁阿密熱火，輸咗就直接提早放暑假；跟住早上10點，西岸第七嘅鳳凰城太陽會同第八嘅波特蘭拓荒者交手，贏嗰隊直接拎西岸第七種子。
去到16號早上7:30分先有76人對魔術嘅東岸第七種子爭奪戰，贏波就鎖定第七；早上10點就有洛杉磯快艇對金州勇士嘅西岸淘汰賽，呢場都係輸波即刻出局。
最後去到17號就係附加賽最高潮，早上7:30分，76人同魔術嘅負方會對住黃蜂同熱火嘅勝方，爭東岸最後一張第八種子入場券；而早上10點，太陽同拓荒者嘅負方就會迎戰快艇同勇士嘅勝方，決定西岸第八種子誰屬，呢兩場生死戰輸咗就真係玩完。各位球迷擔定櫈仔，全年最精彩嘅賽程依家正式開始！
