【Noah 男士線上診所特約】日本JR東日本早前為咗解決車站附近雜草問題,索性請咗兩隻山羊「返工」除草,點知兩位「員工」效率高到超出預期,原定做足3個月,結果一個半月左右已經將草地食到幾乎寸草不生,JR最後決定安排牠們提早「退休」。
Nagi及Pokke負責四谷站900平方米草地
兩隻山羊分別叫Nagi及Pokke,10月9日起被安排到東京新宿區JR四谷站附近約900平方米草地「開工」,每日主要工作就係不停食草。
原本JR預計除草計劃會做到12月,不過兩隻山羊胃口實在太好,短短一個多月已經將大部分可以食的雜草清得七七八八,草地由最初雜草叢生,變成如今幾乎見晒泥地。
草地食清光 JR要額外買牧草
由於現場已經無乜草可以繼續食,JR甚至要額外準備牧草餵牠們。眼見「工作進度」遠超預期,JR宣布兩隻山羊最後工作日定於12月1日,比原先計劃提早收工。
兩隻山羊工作期間亦意外成為四谷站人氣角色,不少附近上班族及學生都會特登停低睇牠們食草。
明年春季或再請山羊除草
「退休」後,Nagi及Pokke會返回牧場過冬。JR東日本表示,明年春季仍計劃再次安排山羊到四谷站除草,不過到時會唔會再由同一對「黃金拍檔」復出,目前仍未決定。