英超再爆冷門，列斯聯作客奧脫福球場憑住奧卡福梅開二度，以2:1擊敗曼聯，打破自1981年2月以嚟從未喺聯賽作客擊敗紅魔鬼嘅宿命！呢場極具歷史意義嘅勝仗，令列斯聯喺護級形勢上大翻身，暫時領先尾三嘅熱刺6分。相反，由看守領隊卡域克帶領嘅曼聯就面臨接手後首場主場敗仗。曼聯全場表現患得患失，下半場中堅利辛度馬天尼斯更因為無啦啦扯對手卡維特利雲嘅馬尾而直接領紅被逐，成為球隊輸波嘅致命傷。
雖然賽前列斯聯贏波行情唔被睇好，但開波初段已經反客為主。開賽僅5分鐘，積頓保高右路發難傳中，皮球意外被曼聯中堅約羅改變方向，造就奧卡福近門建功先開紀錄。落後嘅曼聯中場嚴重失控，頂替因傷缺陣嘅明奴正選上陣嘅烏加迪表現嚴重失準。列斯聯隨後得勢不饒人，奧卡福禁區外施展遠射，皮球再次省中約羅彈入，個人梅開二度幫客隊半場意外領先到2:0，令作客嘅列斯聯球迷陷入瘋狂。
換邊之後曼聯屋漏偏逢連夜雨，踢到56分鐘，利辛度馬天尼斯喺防守時竟然出手扯卡維特利雲嘅頭髮，球證睇完VAR後直接出示紅牌將佢驅逐離場，令紅魔鬼提早陷入十人應戰嘅劣勢。踢少個嘅曼聯其後傾力反撲，戰至尾段終於憑住卡斯米路接應般奴費南迪斯嘅傳中頭槌破網追近至1:2。補時階段紅魔鬼瘋狂攻門，可惜卡斯米路嘅必入波被對手護空門清走，最終無力回天。完場哨聲一響，列斯聯主帥法基激動跪地咆哮，盡顯呢三分對球隊爭取留級有幾咁重要。
