英超頹爆嘅車路士繼續沉淪！星期二作客白禮頓，車仔全場捱打之下以0:3慘敗，苦吞聯賽五連敗之餘，更連續五場食白果。白禮頓全取三分之後，以50分反超前車路士升上聯賽榜第6位；而近9場聯賽只得1勝嘅車仔，如果唔盡快諗辦法止跌回升，隨時連來屆歐洲賽資格都保唔住。
車路士領隊羅仙尼亞今場雖然嘗試變陣同調整戰術，但開波短短3分鐘就宣告失守。白禮頓一次角球攻勢，卡迪奧古接應隊友頭槌二傳撞射入網，迅速打開紀錄。落後嘅車仔踢得一無是處，18分鐘門將羅拔山齊士更出現「派膠」失誤，將個波直接傳畀對方中場巴列巴，好彩查魯巴及時護空門擋出軒素活嘅射門，車仔先至執番身彩。
上半場車路士竟然零中目標射門，換邊後羅仙尼亞換入加拿祖企圖加強攻力，佢一落場亦即刻為拉維亞製造黃金機會，可惜後者炒高。不過車仔嘅反撲只係曇花一現，踢到56分鐘白禮頓發動反擊，魯達助攻畀軒素活將功補過射成2:0。去到尾段，後備入替嘅老將韋碧克再入一球「埋齋」，為白禮頓鎖定3:0勝局，令車仔輸到體無完膚。
賽後羅仙尼亞喺訪問中火力全開，直斥球員表現極不專業：「呢種表現對於車路士呢間球會嚟講絕對唔合格，我唔會講大話，呢場波每個環節嘅表現都係不能接受。呢晚絕對係我執教生涯以嚟最艱難嘅一夜，我絕對唔想再見到今日發生嘅事。」車路士星期日將會喺足總盃四強硬撼列斯聯，呢場波隨時成為決定球隊今季成敗嘅生死戰，羅仙尼亞強調必須同教練團盡快亡羊補牢，為星期日嘅硬仗做好準備。
