英超爭奪前列位置嘅關鍵戰，車路士喺史丹福橋主場出擊，雖然全場佔盡優勢兼狂攻21次，但欠缺運氣下足足三次中楣中柱，加上一次越位詐糊，最終以0:1不敵殘陣應戰嘅曼聯。車路士慘吞聯賽四連敗兼連續四場冇波入，追平球隊自1998年以嚟嘅最差紀錄；相反，曼聯贏波後擴大領先優勢，來屆非常大機會重返歐聯。
車路士主帥羅仙尼亞今場作出兩個調動，解禁復出嘅安素費南迪斯同戴納雙雙正選上陣。開波初段車仔表現搶韁，小將艾斯迪華奧左腳拉弓僅僅貼柱出界，可惜佢隨後因傷退下火線，由倒戈嘅加拿祖入替。安素費南迪斯之後亦有一次黃金機會，但起腳斜出；而戴納嘅補射雖然入網，但因為彭馬越位在先被判詐糊。
大難不死嘅曼聯，今仗雖然有中堅荒，要起用小將希雲同客串嘅馬沙拉維扼守中路，但防線表現硬淨。去到臨完半場前兩分鐘，曼聯發動反擊，般奴費南迪斯擺脫加拿祖後送出靚絕傳中，古夏趕到撞射破網，為曼聯意外領先1:0。呢個助攻亦係般奴今季聯賽第18次，距離追平亨利同迪布尼共同保持嘅單季20次英超助攻紀錄只差兩球。
落後嘅車路士下半場空群而出，狂轟15次射門，但往往失之交臂。戴納接應尼圖傳中頭槌攻門中楣彈出，其後科芬拿嘅頭槌亦省中人再中楣。剛剛續約嘅卡些度尾段遠射僅僅出界，始終未能射破曼聯大門，無奈主場飲恨。曼聯看守領隊卡域克帶領球隊迅速走出上仗不敵列斯聯嘅陰霾，目前拋離第六位嘅車路士10分，幾乎鎖定來季歐聯入場券；而車仔要爭入前五嘅機會率，就暴跌至得番8%。
