曼聯看守領隊卡域克順利完成任務！星期日喺主場奧脫福上演嘅「雙紅會」，曼聯以3:2險勝死敵利物浦，正式鎖定來季歐聯入場券。雖然只要和波就足以達成目標，不過曼聯最終全取三分，自2015-16球季以嚟首次喺聯賽「雙殺」利物浦，目前喺剩低3場聯賽之下，將同死敵嘅分差拉開到6分。呢場勝仗亦意味住卡域克接手以嚟，已經成功擊敗晒所有英超「Big 6」球隊，對佢爭取喺2025-26球季後「坐正」絕對係打下一支大強心針。
上半場嘅戰況，完全睇唔出曼聯要贏波會經歷咁多波折。面對住有沙拿、艾利臣、伊沙克等多名主力缺陣嘅利物浦，曼聯一開波已經信心爆棚。雖然佢哋刻意讓出控球權（上半場控球率僅38.2%），但靠住突擊戰術踢得風生水起。古夏嘅射門省中麥阿里士打改變方向入網先開紀錄；之後利物浦第三門將活文撲出不遠，皮球幸運地撞中錫斯高跌入網窩，將比數拉開到2:0。曼聯帶住兩球優勢返更衣室，睇落大局已定。
點知換邊後風雲變色，曼聯短短10分鐘內連嘔兩球！半場入替錫斯高嘅迪亞路一落場就喺中場交失波，被蘇保斯拉爾長驅直進單騎破網。噩夢仲未完，門將林文斯後場傳畀卡斯米路時竟然「派膠」被截，麥阿里士打順勢交畀蘇保斯拉爾，再橫傳畀加普輕鬆射入空門，極速追成2:2。呢段時間曼聯表現完全走樣，卡斯米路同明奈急於上前助攻，令原本穩健嘅防線變得極度空虛，一度被利物浦㩒住嚟攻，幾乎反勝為敗。
好彩踢到尾段，曼聯終於企穩陣腳。剛喺今個星期簽下新約嘅明奈成為奧脫福嘅英雄，迪亞路將個波頂回危險地帶，利物浦解圍不遠，明奈喺禁區邊緣把握機會射入左下角死角！呢球係佢自2024年5月以嚟首個英超入球，幫曼聯驚險贏3:2。雖然球隊今場大起大落嘅表現有待改善，但能夠喺連失兩球嘅打擊下展現出極強韌力再度超前，呢場「雙紅會」勝仗絕對值得紅魔球迷高興。
