英超爭標「天王山之戰」，曼城喺主場以2:1力克榜首嘅阿仙奴。正如曼城主帥哥迪奧拿賽前所講，球隊今仗非勝不可；而贏波之後，曼城成功追到只係落後「兵工廠」3分，而且仲手執少踢一場嘅優勢。如果「藍月亮」喺補賽順利擊敗瀕臨降班嘅般尼，隨時可以奪過聯賽榜首寶座，完全掌握爭標主動權！
今場大戰節奏明快兼充滿戲劇性。開波僅僅15分鐘，曼城就憑住卓基嘅個人表演先拔頭籌。呢位法國中場喺禁區頂接應後，憑靈巧腳法連過幾關，冷靜射破大衛拉耶嘅十指關。呢球盡顯身價嘅入波，亦係卓基今季各項賽事嘅第10個入球，為曼城注下強心針。不過，卓基嘅靚波好快就被隊友嘅失誤掩蓋。曼城門將當拿隆馬接應隊友回傳後，喺禁區內遲遲未有大腳解圍，結果被上前積極逼搶嘅夏維斯直接將皮球踢入網窩。呢個難以解釋嘅低級失誤，白白奉送阿仙奴一個扳平入球，令雙方回到起跑線。
換邊後，阿仙奴其實有極多反勝機會，可惜運氣始終差啲。夏維斯一次極具威脅嘅反擊單刀，被將功補過嘅當拿隆馬勇救；後備入替嘅馬天尼利補射亦未能破網。最令客隊球迷揼心口嘅莫過於伊斯嘅射門中內柱後沿住白界線溜過，加上加比爾嘅頭槌省中奧拉利再中柱彈出，令阿仙奴多次黃金機會都無功而還。大難不死嘅曼城，最終靠「入球機器」夏蘭特奠定勝局。當拿隆馬大腳策動反擊，令阿仙奴後防空虛，奧拉利送出致命傳中，夏蘭特成功擺脫加比爾，喺遠柱撞射入網。呢個係夏蘭特今季第34個入球，亦係佢11次對陣阿仙奴攻入嘅第6球。
值得一提嘅係，夏蘭特同加比爾今仗火藥味極濃。除咗開波初段加比爾有一次疑似禁區內手球犯規未有被判罰12碼之外，下半場兩人更曾發生激烈衝突，加比爾疑似用頭頂向夏蘭特，但球證安東尼泰萊及VAR均認為未足以拔出紅牌，令加比爾執番身彩。種種爭議同埋扣人心弦嘅戰況，令呢場榜首大戰話題十足，同時亦令英超爭標直路充滿懸念。
