歐聯八強首回合繼續上演，巴塞隆拿喺魯營主場出擊，雖然全場佔盡優勢，但因為中堅古巴斯完半場前領紅牌被逐成為比賽轉捩點，最終被馬德里體育會嘅艾華利斯同後備上陣嘅索洛夫各建一功，以0:2飲恨。馬體會成功反客為主搶佔晉級先機，令巴塞喺下星期嘅次回合面臨出局嘅巨大危機。呢場係兩隊今季第五次交手，亦係短短四日入面嘅第二次碰頭，幾日前巴塞先喺西甲作客贏2:1，估唔到今場形勢大逆轉。
上半場巴塞其實控制晒大局，拉舒福特早段已經有埋門機會，去到18分鐘更一度將個波送入網，可惜因為隊友耶馬參與攻勢時越位在先被判詐糊。就喺巴塞越踢越順嘅時候，比賽喺臨完半場出現戲劇性轉變。古巴斯喺防守時從後踢跌單刀嘅小施蒙尼，經過VAR覆核後被球證直接出示紅牌驅逐離場，令佢成為歐聯史上首位兩次被逐嘅小將。馬體會隨即把握呢個禁區頂大約25碼嘅罰球機會，由艾華利斯主射靚絕嘅罰球直飛死角破網，以1:0領先返更衣室，呢球亦係艾華利斯今屆歐聯嘅第9個入球，打破咗名宿迪亞高哥斯達嘅隊史單季紀錄。
換邊後巴塞主帥費歷克收起利雲度夫斯基同柏迪，但踢少個嘅巴塞依然攻勢凌厲，全場錄得18次射門。拉舒福特下半場表現極之活躍，曾經試過窄角度起腳射中網側，之後主射罰球又被對方門將救到再中楣。雖然馬體會下半場大部分時間都俾對手壓住嚟打，但佢哋勝在埋門極具效率，踢到70分鐘，後備入替嘅索洛夫接應魯加利第一時間傳送撞射遠柱入網，將比數拉開到2:0。尾段巴塞空群而出，簡些路埋門亦唔好彩中柱彈出，最終無奈吞下兩蛋，雖然賽後依然獲主場球迷拍掌鼓勵，但次回合必須要面臨大反擊嘅艱鉅任務。
