歐霸盃八強首回合上演激戰，阿士東維拉作客意大利硬撼博洛尼亞，憑住射手屈堅斯梅開二度，加上干沙建功，最終以3:1擊敗對手，成功喺兩回合賽事中搶佔巨大優勢。呢場勝仗唔單止令維拉喺「歐霸專家」主帥艾馬利帶領下豪取賽事八連勝，距離打破30年錦標荒兼爭取下屆歐聯資格又行近一大步，同時亦令佢哋次回合返到主場出擊時充滿信心。
維拉今場波贏得一啲都唔輕鬆，皆因佢哋對上一次踢正式比賽已經係18日之前，開局明顯未入局，搞到初段門前風聲鶴唳。博洛尼亞把握主場氣勢狂攻，踢到28分鐘卡斯度一度將皮球送入網，好彩經過VAR覆核後越位在先被判詐糊；兩分鐘後費格遜嘅埋門又中楣彈出，令維拉避過一劫。大難不死嘅維拉去到臨完半場前終於打破僵局，干沙接應泰利文斯嘅角球，趁對方門將出迎失誤喺遠柱頂入，半場意外領先1:0。
換邊後短短六分鐘，屈堅斯把握對方守將希根嘅失誤，冷靜射穿門將大細龍門，幫維拉擴大優勢到2:0。落後嘅博洛尼亞並無放棄，全場狂轟19次射門遠超維拉嘅8次，去到90分鐘終於有回報，由表現極活躍嘅英格蘭兵莊拿芬路維用一記精彩彎球射破大門追近至1:2。就喺主隊以為見到一絲曙光之際，補時5分鐘屈堅斯喺角球攻勢中再建一功，將比數鎖定為3:1完場。由於維拉過去年半內兩次主場對博洛尼亞都贏波而回，今次帶住兩球優勢返地頭，晉級四強絕對係高唱入雲。
