大埔宏福苑大火獨立調查委員會今日（15日）舉行第十二場聽證會，會上播放一段火警初期的999求助錄音，一名居於宏昌閣17樓的女住戶報稱被濃煙圍困，最終不幸離世。錄音內容顯示，接線生未有將通話轉駁消防，對話最後以「你有需要再打嚟啦」結束通話。錄音播放期間，公眾轉播室傳來陣陣嘆息聲。
接線生： 你有冇即時危險，需唔需要消防帶你走？
居民： 我而家喺廁所出唔到去，太多煙。
接線生： 咁係咪，你需唔需要消防幫手呀？
居民： 棚架嗰度燒呀，一樓。
接線生： 係呀消防已經到咗。
居民： 我唔知，啱啱瞓醒覺，睇到好多煙。
接線生： 你就答我，你需唔需要駁過去消防，搵消防帶你走。
居民： 我而家喺廁所，佢好多煙攻入嚟。
接線生： 你答我啦，你需唔需要？
居民： 我而家出唔到嚟。
接線生： 點解出唔到嚟，你喺廁所咋嘛？
居民： 係呀，我都去咗廁所，門口嗰度太多煙，黑晒睇唔到呀。
接線生： 你住緊幾樓呀？
居民： 我而家17樓。
接線生： 17樓咁你需唔需要消防過嚟呀？
居民： 佢而家係咪救緊吖？
接線生： 係呀佢救緊㗎啦。
居民： 哦，咁我閂晒啲窗，我而家喺廁所。
接線生： 你有需要再打嚟啦咁樣，好唔好？
居民： 好，唔該。
接線生： 拜拜。
委員會資深大律師杜淦堃指出，相關做法與一般處理程序不符，認為在火警情況下，接線生應即時將求助個案轉駁消防，而非反覆詢問求助者是否需要協助。他又指，求助人未必能準確判斷自身風險，接線生不應將決定交由對方。
消防處副消防總長（行動支援及專業發展）黃思律作供時表示，未曾接觸相關警方守則，但認為該名接線生「可以做得更好」，亦同意做法並不恰當，並指過往未曾聽聞類似處理方式。
聽證會亦披露，類似對話並非個別事件。杜淦堃表示，即使無法確定若當時成功轉駁消防是否能改變結果，「不幸地，呢個求助者救唔到」。
