曼聯喺看守領隊卡域克帶領下繼續大打爭氣波！尋晚佢哋喺主場以2:1擊敗有「和波專家」之稱嘅賓福特，全取三分後距離來屆歐聯資格只係爭兩分。呢場勝仗唔單止證明咗卡域克嘅領軍功力，同時亦為佢爭取坐正成為正式領隊打下一支強心針。如果曼聯喺最後四場聯賽順利贏晒，更有望以第三名衝線，創下近三季嘅最佳成績，絕對有助球隊喺夏天吸引星級猛將加盟。
面對住賽前六場不敗嘅賓福特，曼聯一開波已經展現出強烈嘅求勝慾望。中場小將明奈表現八面玲瓏，早段已經發難為迪亞路製造機會，可惜後者射中人未能先開紀錄。戰至中段，曼聯憑住一個角球戰術打破僵局。般奴費南迪斯右路斬遠柱，麥佳亞力壓對手二傳，由卡斯米路喺遠柱衝前頂入。呢球係卡斯米路今季聯賽第9個入波，入波後佢更激動親吻會徽慶祝。
落後嘅賓福特隨後傾力反撲，伊哥泰亞高多次獲得黃金機會，但始終未能轉化為入球。去到臨完半場前，曼聯成功再下一城。迪亞路喺後防關鍵攔截成功，皮球落到般奴腳下策動反擊。般奴狂奔大半場後，直線交畀左路嘅錫斯高，後者假動作避開守衛後右腳勁射破網，將比數拉開到2:0，呢個助攻亦係般奴今季英超第19次助攻。
換邊之後，曼聯並無因為缺少受傷嘅古夏而受影響。卡域克果斷變陣，用馬沙拉維入替迪亞路，轉踢三中堅加兩個翼衛嘅五人防線穩守突擊。曼聯喺下半場踢得充滿自信，傳控節奏流暢。老將麥佳亞喺後防表現英勇，多次化解險境，甚至喺門前混戰中被奧亞達拉踢中頭部都在所不惜。雖然賓福特未有放棄，並喺尾段憑住贊臣喺20碼外嘅遠射破蛋，但亦無阻曼聯以2:1全取三分。曼聯贏波之後士氣如虹，星期日將會喺主場迎戰死敵利物浦。以曼聯目前攻守兼備嘅回勇狀態，相信利物浦作客奧脫福絕對會面臨一場超級硬仗。
