歐聯八強次回合昨晚深夜上演，巴塞隆拿作客雖然以2:1擊敗馬德里體育會，但兩回合計總比數依然以2:3飲恨出局。馬體會憑住首回合嘅優勢驚險保住勝果，成功自2016-17球季以嚟首次殺入歐聯四強。巴塞今場雖然一度連追兩球，可惜尾段又有球員領紅牌被逐，最終無力上演大逆轉。
首回合落後0:2嘅巴塞今仗背水一戰，開波短短不足4分鐘就由小將耶馬接應費倫托利斯嘅傳送，冷靜射破門將梅素十指關，極速打開紀錄。呢球不但係巴塞自2018年美斯以嚟最快嘅歐聯淘汰賽入球，更令18歲零275日嘅耶馬成為歐聯史上最年輕累積參與20個入球（入波加助攻）嘅球員。戰至24分鐘，費倫托利斯由助攻變入波，勁射破網幫巴塞將總比數追成2:2平手，令晉級懸念重燃。
氣勢如虹嘅巴塞原本有機會喺總比數反超前，可惜費明盧比斯門前失機，仲意外俾對手踢中面部。大難不死嘅馬體會去到31分鐘企穩陣腳兼把握到反擊機會，馬高斯羅蘭迪右路突破後送出靚絕傳中，陸文第一時間撞射入網，為主隊喺總比數再次領先3:2。
換邊後巴塞繼續狂攻，費倫托利斯一度將加維省中人嘅射門補中，可惜越位在先食詐糊。去到79分鐘，巴塞再遭逢致命打擊，艾歷加西亞拉跌單刀嘅後備前鋒索洛夫，球證睇完VAR後直接出示紅牌將佢驅逐離場，令巴塞創下歐聯淘汰賽兩回合都有球員被逐嘅尷尬紀錄（首回合古巴斯領紅）。踢少個嘅巴塞喺尾段未有放棄，但阿拿祖近門頭槌頂高，錯失將比賽拖入加時嘅最後黃金機會。巴塞主帥費歷克賽後對紅牌判決感到極度憤怒，認為呢個判決徹底摧毀咗球隊絕地反擊嘅希望。
