今日（27日）上午7時21分，警方接報指吐露港公路近香港教師會李興貴中學對開發生交通意外，涉及一輛客貨車及3輛私家車，至少2人受傷送院。
網上流傳車Cam片段所見，吐露港公路最右線多輛車行駛期間，前方車輛疑因應路面情況收慢，尾隨3輛私家車收掣不及，先後相撞「炒埋一碟」。
尾隨一輛白色客貨車見狀即時扭左軚閃避，期間先撞及其中一輛車，其後失控橫越3條行車線，直駛至路肩位置。片段可見，後方另一輛私家車駛至時立即打燈並停下，未有再撞上客貨車，避過二次意外。
事故發生於早上繁忙時間，導致現場交通一度受阻，有駕駛人士表示車龍一度塞至粉嶺一帶。不少網民觀看片段後，質疑涉事車輛跟車太貼及未有保持安全距離，有人留言指「切勿跟車太貼」、「朝早最驚就係呢啲」，亦有人形容「直路都炒，真係累人累物」。
亦有網民留意到片主與前車保持一定距離，避過捲入意外，大讚「呢個距離做得好」，認為繁忙時間在高速公路行駛，更應預留足夠煞車空間，避免前方一收慢便釀成連環相撞。
Credit: 車cam L/Right Too
